Ўзбекистон миллий терма жамоаси ноябрь ойидаги ФИФА куни учун ўртоқлик учрашувини ўтказиш борасида Испания терма жамоасига таклиф билан чиқди. Бу ҳақда Испаниянинг "Марка" газетаси расмий веб-сайти хабар тарқатди.

Ноябрь ойидаги ФИФА кунлари учун Испания футбол федерациясига бир нечта таклифлар тушган. Агар Испания терма жамоаси ЖЧ-2014 саралашининг плей-офф босқичида иштирок этишга мажбур бўлмаса, у ҳолда терма жамоа ихтиёрида 2та бўш ФИФА куни бўлади.

Сайтнинг келтиришича, Жанубий Африка терма жамоаси Испанияни Йоханнесбургга таклиф қилган. Ундан ташқари, Ўзбекистон ва Ҳиндистондан таклифлар бор. Шунингдек, Япония билан ҳам ўртоқлик учрашуви борасида музокаралар олиб борилмоқда. "Ноябрдаги кунлар учун иқтисодий томонлама манфаатли тушган" деб ёзилади манбада.

Испания терма жамоаси 6 сентябрь куни Финляндия билан ЖЧ-2014 саралаш баҳсини ўтказади. 10 сентябрь куни учун эса Баҳрайн терма жамоаси испанларга молиявий жиҳатдан анча яхши бўлган ўртоқлик учрашувини таклиф қилган.

"Агар ушбу лойиҳалар амалга ошса, Испания футбол федерацияси 5 млн. доллардан ортиқ даромад кўради. Терма жамоа ноябрда бир ҳафта ичида ҳам Йоханнесбургда, ҳам бошқа терма жамоа билан ўртоқлик ўйини ўтказиш йўлини топиши мумкин", деб ёзади "Марка".