Хабарингиз бор, аёллар миллий терма жамоамиз Иорданияда ўтказилган Осиё чемпионати-2014 саралаш басҳларида иштирок этиб, якунда гуруҳдан чиқа олмади. Охирги ўйинда футболчиларимизга фақат ғалаба керак эди, аммо учрашув биз ўйлагандек якун топмади. Владислав Хан шогирдлари 0:4 ҳисобида имконият бой бериб қўйишди. Терма жамоамиз Иордания сафаридан қайтиб келгач, катта мураббий Гўзал Мухутдиновадан қисқача интервью олдик.

— Сизнингча, охирги ўйинда нима учун йирик мағлубият юзага келди?
— Учрашувни ёмон бошламадик. Биринчи бўлимда ҳисоб очилмади. Аммо танаффусдан кейин жавобсиз тўртта гол ўтказиб юбордик. Ўйлайманки, бизга озгина омад етишмади.

— Бундан барчанинг кайфияти тушиб кетган бўлса керак?
— Албатта. Ахир ҳаммамиз Иорданияга Осиё чемпионати масаласини ҳал қилиш учун боргандик. Лекин бу – футбол ва унда мағлубиятлар ҳам бўлиб туради.

— Маълумки, сиз бош мураббий сифатида бошқараётган “Шўртан-Леди” яқинда Ўзбекистон Кубоги доирасида “Машъал-W” билан иккита ўйин ўтказади. Тайёргарлик қандай кетяпти?
— Баъзи муаммоларни ҳисобга олмаганда яхши. Ҳозир тўрт нафар қизимиз даволанаётгани туфайли 17 июнь кунги баҳсда майдонга туша олмаслиги мумкин. Булар – Аблякимова Ильвина, Мардонова Дилафрўз, Ҳақбердиева Гулсара ва Назарова Сарвиноз. Қолган ҳаммаси эса жойида. Ҳозир 17 ва 19 июнь куни бўлиб ўтадиган баҳсларга тайёргарликни давом эттиряпмиз.