Ўзбекистон терма жамоаси ва Москва ЦСКА клуби яримҳимоячиси Аббосбек Файзуллаев ўз самарадорлигининг пасайиш сабабини тушунтирди. Маълум бўлишича, бу ҳолатга майдондаги роль ўзгариши таъсир қилган.

"Менга ҳам иккинчи даврада самарадорлигим ўзгаргандек туюлаяпти. Шуни айтмоқчиманки, мен учун бу янги позиция, у ерда кўпроқ орқага қайтиб ёрдам беришим керак бўляпти. Шу сабабли, деб ўйлайман, ўйиним унчалик чиқмаяпти. Лекин энг муҳими — мен жамоага ёрдам беришни истайман. Агар мураббий мени шу ўринда кўраётган ва шу позиция қўяётган бўлса, мен ўйнайман ва жамоага ёрдам беришга ҳаракат қиламан.

Мураббий мени айнан шу ўринда кўряпти ва жисмоний ҳолатимдан хабардор. Қишки йиғинларда тестлар ўтказилганди ва мен энг яхши кўрсаткичларга эга бўлган эдим. Шунинг учун мураббий мени бу позицияга қўйди. У менга у ерда қандай ўйнаш кераклигини ўргатяпти ва мен ҳаракат қиляпман", — дея Файзуллаевнинг сўзларини келтиради "Матч ТВ".

Ушбу мавсумда 21 ёшли Файзуллаев ЦСКА сафида барча мусобақаларда 33 та учрашувда майдонга тушди. Ушбу ўйинларда у 3 та гол урди ва 7 та голли узатма амалга оширди. Аммо Россия премьер-лигасининг (РПЛ) сўнгги 11 ўйинида у натижали ҳаракат қайд этмаган.