O‘zbekiston terma jamoasi va Moskva SSKA klubi yarimhimoyachisi Abbosbek Fayzullayev o‘z samaradorligining pasayish sababini tushuntirdi. Ma’lum bo‘lishicha, bu holatga maydondagi rol o‘zgarishi ta’sir qilgan.

"Menga ham ikkinchi davrada samaradorligim o‘zgargandek tuyulayapti. Shuni aytmoqchimanki, men uchun bu yangi pozisiya, u yerda ko‘proq orqaga qaytib yordam berishim kerak bo‘lyapti. Shu sababli, deb o‘ylayman, o‘yinim unchalik chiqmayapti. Lekin eng muhimi — men jamoaga yordam berishni istayman. Agar murabbiy meni shu o‘rinda ko‘rayotgan va shu pozisiya qo‘yayotgan bo‘lsa, men o‘ynayman va jamoaga yordam berishga harakat qilaman.

Murabbiy meni aynan shu o‘rinda ko‘ryapti va jismoniy holatimdan xabardor. Qishki yig‘inlarda testlar o‘tkazilgandi va men eng yaxshi ko‘rsatkichlarga ega bo‘lgan edim. Shuning uchun murabbiy meni bu pozisiyaga qo‘ydi. U menga u yerda qanday o‘ynash kerakligini o‘rgatyapti va men harakat qilyapman", — deya Fayzullayevning so‘zlarini keltiradi "Match TV".

Ushbu mavsumda 21 yoshli Fayzullayev SSKA safida barcha musobaqalarda 33 ta uchrashuvda maydonga tushdi. Ushbu o‘yinlarda u 3 ta gol urdi va 7 ta golli uzatma amalga oshirdi. Ammo Rossiya premyer-ligasining (RPL) so‘nggi 11 o‘yinida u natijali harakat qayd etmagan.