Ўзбекистон кубоги гуруҳ босқичидан ўрин олган «Шўртан» — «Олимпик» (3:0) учрашувидан сўнг меҳмонлар устози Мирко Еличич матбуот анжуманида иштирок этди.

"Дастлабки дақиқаларда ўйин натижасига таъсир ўтказган ҳодиса рўй берди. Бундай ҳолатларда қандай қоида қўлланишини билмайман, очиғи. Лекин учрашувга ўша вақт нуқта қўйиб бўлинганди. «Шўртан»ни ғалаба билан табриклайман.

— «Олимпик» олдига натижадан кўра ёшларни тарбиялаш вазифаси қўйилган. Жамоа ҳозирги вақтда кетма-кет мағлуб бўлмоқда. Жамоа олдига ёш футболчиларни тарбиялашдан бошқа мақсадлар ҳам қўйилганми?

— Бизда асосий вазифа ёшларни тарбиялаш. Ўз олдига жиддий мақсад қўядиган жамоа иқтидорли ёшларни йиғиши керак. Биз эса мавсум бошланишига бир ой қолганда жамоа йиғишни бошладик. Таркибимизда бир нечта ёши каттароқ футболчилар ҳам бор. Айрим бир ёш футболчиларга имконият бериб кўрса, уларни кашф этиш мумкин. Биз бу йўлни танлаганмиз.

Ҳозирги «Олимпик» икки йил аввалги жамоадек эмас. Масалан, биз "Олимпик Мобиуз" каби энг яхши ёшларни йиға олмаймиз. Бизнинг таркибимиздаги ёш футболчилар собиқ жамоаларида ўйнаб кета олмаганлардир. Биз «иккинчи» даражадамиз десак бўлади.

— Демак, жамоангизда мавсум давомида ўзгаришлар бўлмайди ва таркиб ўзгармайдими?

— Ўзгаришлар бўлиши аниқ. Футболчиларда максимал хоҳиш бўлиши керак, айримларда эса буни кўрмаяпман. Жамоада қолишни истамаётганларни мажбур олиб қолиш ниятимиз йўқ.

— Футболда кўп нарса моддий томонга бориб тақалади. Клубнинг ёмон натижаларига молиявий барқарорсизлик сабабми?

— Катта футболда жиддий натижаларга эришиш учун молиявий жиҳатдан муаммолар бўлмаслиги керак. Биз бу ҳақда ўйламасликка ҳаракат қиляпмиз. Футболчиларимиз кам ойлик олишади. Мен уларга пул ҳақида эмас, футбол ҳақида ўйлаш ҳақида айтяпман.