Суперлиганинг 8-туридан ўрин олган ОКМК – "Андижон" (4:3) учрашувидан кейин ташкил этилган матбуот анжуманида дастлаб андижонликлар бош мураббийи Александр Хомяков иштирок этди.

- Афсуски, ўйинни бой бердик. Биринчи бўлимда ҳарқалай ёмон тўп сурмадик. Аммо бугунги натижа барибир хафсалани пир қилмасдан қолмади. Иккинчи таймда кўп нарса ўзгариб кетди. Ўйинни бир қанча жабҳаларида сира омадимиз чопмади. Ҳисобдаги фарқни сақлаб қола олмадик. Аксинча, дарвозамиздан тўплар ўтказиб юбордик. Охирги дақиқалар биз учун омадсиз бўлди. Ҳужумларимизни ҳам тузукроқ ривожлантиришни уддасидан чиқмадик. Хуллас, ўзингиз ҳам кўрдингиз, бугун умуман ўйинимиз қовушмади. Фақат хафсала пир бўлгани қолди, холос. Бундан бошқа ниманидир қўшимча қила олмасам ҳам керак.

- Рақибни ўйинини қандай баҳолайсиз?

- Бу рақиб одатда ўйиннинг охирги дақиқаларида голлар киритади. Унга қарши бугун ҳеч нарсани уддалай олмадик. Сўнгги дақиқаларда яхши ҳаракат қиляпти ва бугун ҳам шундай бўлди. Ҳатто, бир ўйинчи кўп бўлиб тўп сурган ҳолда ҳам тузукроқ натижага эришмаганимиз жуда эриш туюляпти. Омад чопмаса қийин экан. Сон жиҳатдан устунлик ҳам бундай маҳалда ёрдам бермайди. Бир ўйинчи кўп бўлганимизда ўйинни қўлга олишимиз керак эди. Қанотлардан рақибни сиқишга ҳаракат қилдик. Аммо буни ҳам уддасидан чиқмадик. Ҳимоядан ҳужумга ўтиш чоғида ҳам сусткашликка йўл қўйдик. Рақиб имкониятларидан яхши фойдаланди. Ирода ва хоҳиш эвазига ғалаба қозонди. Бир сўз билан айтганда, рақиб бизни ҳар томонлама мағлуб этди. ОКМКни ғалаба билан табриклайман.