Superliganing 8-turidan o‘rin olgan OKMK – "Andijon" (4:3) uchrashuvidan keyin tashkil etilgan matbuot anjumanida dastlab andijonliklar bosh murabbiyi Aleksandr Xomyakov ishtirok etdi.

- Afsuski, o‘yinni boy berdik. Birinchi bo‘limda harqalay yomon to‘p surmadik. Ammo bugungi natija baribir xafsalani pir qilmasdan qolmadi. Ikkinchi taymda ko‘p narsa o‘zgarib ketdi. O‘yinni bir qancha jabhalarida sira omadimiz chopmadi. Hisobdagi farqni saqlab qola olmadik. Aksincha, darvozamizdan to‘plar o‘tkazib yubordik. Oxirgi daqiqalar biz uchun omadsiz bo‘ldi. Hujumlarimizni ham tuzukroq rivojlantirishni uddasidan chiqmadik. Xullas, o‘zingiz ham ko‘rdingiz, bugun umuman o‘yinimiz qovushmadi. Faqat xafsala pir bo‘lgani qoldi, xolos. Bundan boshqa nimanidir qo‘shimcha qila olmasam ham kerak.

- Raqibni o‘yinini qanday baholaysiz?

- Bu raqib odatda o‘yinning oxirgi daqiqalarida gollar kiritadi. Unga qarshi bugun hech narsani uddalay olmadik. So‘nggi daqiqalarda yaxshi harakat qilyapti va bugun ham shunday bo‘ldi. Hatto, bir o‘yinchi ko‘p bo‘lib to‘p surgan holda ham tuzukroq natijaga erishmaganimiz juda erish tuyulyapti. Omad chopmasa qiyin ekan. Son jihatdan ustunlik ham bunday mahalda yordam bermaydi. Bir o‘yinchi ko‘p bo‘lganimizda o‘yinni qo‘lga olishimiz kerak edi. Qanotlardan raqibni siqishga harakat qildik. Ammo buni ham uddasidan chiqmadik. Himoyadan hujumga o‘tish chog‘ida ham sustkashlikka yo‘l qo‘ydik. Raqib imkoniyatlaridan yaxshi foydalandi. Iroda va xohish evaziga g‘alaba qozondi. Bir so‘z bilan aytganda, raqib bizni har tomonlama mag‘lub etdi. OKMKni g‘alaba bilan tabriklayman.