Бразилиялик хавбек Каземиронинг "Манчестер Юнайтед"да маоши оширилиши мумкин. Mirror таблоидининг хабар беришича, агар "қизил иблислар" мавсум якунларига кўра Чемпионлар лигасига чиқса, ярим ҳимоячининг маоши ошади.
Нуфузли турнирга йўлланма олган тақдирда Каземиронинг маоши 100 мингга ошади. Шундай қилиб, унинг ҳафталик маоши 500 минг фунтни ташкил этади. Эътиборлиси, худди шу маошни португалиялик юлдуз Криштиану Роналду "Олд Траффорд"га қайтган вақтида олган эди.
"Манчестер Юнайтед" Чемпионлар Лигасига чиқиш учун Европа Лигасида ғалаба қозониши керак. 1/2 финалнинг дастлабки баҳсида Рубен Аморим жамоаси "Атлетик"ни йирик 3:0 ҳисобида мағлуб этди.
