Ўзбекистон терма жамоаси 18 июнь куни Қатарни имкон қадар йирик ҳисобда мағлуб этиши шарт. Бу Қосимов шогирдларининг муҳим вазифаларидан бири.

Ўйин эса ФИФАнинг қарори билан соат 17:00да бошланади. Кун роса исиб, энди тафти қайтаётган бўлади. Лекин бугун ва ўтган куни пойтахтимизда ёмғир ёғиб ўтди. Ёмғирдан кейин ҳаво ҳарорати мўътадил бўлиб қолади. Ўйин бўладиган кун — 18 июнь куни Тошкентда қандай ҳаво ҳарорати ҳукм суриши борасидаги саволга жавоб излаш мақсадида бир нечта сайтларнинг маълумотларини келтирамиз.

Ўзбекистон гидрометеорология хизмати маркази сайтининг хабар беришича, 18 июнь куни кундузи Тошкентда ҳаво ҳарорати 30-32 даража иссиқ бўлади. Ёғингарчилик бўлмайди.

Погода.уз сайти ҳам ўйин бўладиган куни пойтахтда ҳаво очиқ бўлиб, 31 даража иссиқ бўлишини тахмин қилган.

Mail.ru'нинг об-ҳаво хизмати эса маълумотларига кўра, 18 июнь куни Тошкентда +25... +30 даража атрофида иссиқ бўлади. Яндексда ҳам кўрсаткич 31 С га тенг.

Хуллас, деярли барча об-ҳаво маълумотлари тарқатадиган сайтларда бир хил кўрсаткич. 18 июнь куни кундузи ҳаво ҳарорати 30 даражага кўтарилади. Ўйин бошланадиган пайтда ҳаво 28 даражагача пасайиб, ўйин якунланиш арафасида 20-25 даражада атрофида бўлади.