“Барселона” футболчилари Ансу Фати ва Ферран Торрес учун “Сан Сиро” (Жузеппе Меацца) стадиони янгилик эмас. Бу машҳур аренани улар ёқимли хотиралар билан эслашади.

2019 йил 10 декабрь куни шу стадионда бўлиб ўтган “Интер” – “Барселона” учрашуви 85-дақиқасида Ансу Фати майдонга тушган эди. У ортидан, 87-дақиқада ғалаба голини урди ва шу тариқа УЕФА Чемпионлар Лигаси тарихида гол урган энг ёш футболчига айланди — 17 ёш 40 кун.

Ферран Торрес эса 2021 йил 6 октябр куни “Сан Сиро”да ўтган УЕФА Миллатлар Лигаси ярим финалида Италия ва Испания терма жамоалари ўртасидаги тўқнашувда асосий қаҳрамонлардан бирига айланган. У биринчи бўлимда иккита гол уриб, Испанияга ғалаба келтирган ва Италия термасига 37 ўйинлик мағлубиятсиз серияда нуқта қўйган эди.

Шундай экан, бугунги “Интер” – “Барселона” учрашуви олдидан мазкур стадион Ансу ва Ферран учун ўзгача маънога эга. Улар учун бу аренадан яна бир бор тарих ёзиш имкони бор.