“ПСЖ” бош мураббийи Луис Энрике Чемпионлар Лигаси ярим финалида “Арсенал”га қарши жавоб ўйини олдидан жамоанинг асосий устунликлари ҳақида гапирди. Эртага жамоалар “Парк де Пренс” стадионида майдонга тушади. Биринчи учрашувда парижликлар 1:0 ҳисобида ғалаба қозонган эди.

“Ярим финал олдидан биз бу ҳақда аллақачон гапирган эдик. Жамоа қурилиши жараёнида биринчи йил — ишлашга, иккинчи йил эса ўсиш ва ўз салоҳиятига ишонч билан қарашга бағишланади. Кейингисида эса биз барқарорликка эришишда давом этамиз.

Мен жамоамизда бирор чизиқ (ҳужум, ярим ҳимоя ёки ҳимоя) бошқалардан устун деб ҳисобламайман — бунинг ўзи катта ютуқ. Биз ҳисоб-китоб қилувчи жамоа эмасмиз. Биз ҳар бир ўйинда бир хил механикага амал қилишга интилганмиз. Бу осон эмас ва аниқ фикр ҳамда принциплар талаб этади.

Эртанги ўйин оғир бўлади. Рақамларда ҳам шундай кўринади. Бироқ биз биринчи кундан бошлаб нималар қилган бўлсак, шуни такрорлашга ҳаракат қиламиз. Биздаги сифатлар — бу бизнинг устунлигимиз”, — деди Энрике.