Мадриднинг «Реал» клуби «Ливерпуль» ҳимоячиси Трент Александр-Арнольдни ўз сафига қўшиб олиш бўйича музокараларни якунига етказмоқда. Бу ҳақда As нашри хабар берди.

Аввалроқ 26 ёшли футболчи жорий мавсум якунланиши билан «Ливерпуль»ни тарк этишини расман эълон қилган эди. Манбаларга кўра, Александр-Арнольднинг «Реал» билан шартнома имзолаши деярли аниқ. Ҳозирча шартноманинг муддати борасида келишув қолмоқда — 5 ёки 6 йиллик бўлиши мумкин.

Расмий эълон Ла Лиганинг мавсум якунланиши билан берилиши кутилмоқда. Бироқ агар «Реал» чемпионлик имкониятларини илгарироқ йўқотса, бу жараён тезлашиши мумкин.

Мадрид клуби футболчини Клублар ўртасидаги жаҳон чемпионатида иштирок эттиришни режалаштирмоқда ва шу мақсадда «Ливерпуль»га рамзий тўлов — тахминан 900 минг евро тўлашга тайёр. Шунингдек, Александр-Арнольд «Ливерпуль»даги шартномасининг сўнгги ҳафталари учун маошдан воз кечиши мумкин — бу маблағни унга «Реал» тўлаб беради.

Жорий мавсумда Трент АПЛда 31 та ўйинда иштирок этди, 3 та гол ва 6 та голли узатма билан фаолият юритди.