Испанияда бир пайтлар катта ҳурматга сазовор бўлган собиқ футболчи Роналдо бошқараётган “Вальядолид” клубида вазият тобора ёмонлашмоқда. Жамоа Ла Лиганинг сўнгги ўрнида жойлашган ва клуб атрофида кескин танқидлар кўпаймоқда.

Муаммоларнинг асосий сабабчиси сифатида айнан Роналдо кўрсатилмоқда. У клуб президенти бўлгани ҳолда, кўп ҳолларда жамоа ўйинларида қатнашмаяпти. Охирги вақтларда эса вазият бутунлай шов-шувга айланди — ўтган дам олиш кунларида “Вальядолид” “Барселона”га ютқазиб турган пайтда, Роналдо Мадридда дўстлари билан алкоголь таъсирида тасвирга олинди. Видеолавҳаларда уни дўстлари икки томондан қўлтиқлаб, машинага ўтказаётгани акс этган.

Мухлислар орасида бунга нисбатан жиддий эътирозлар кузатилмоқда. Клуб форумларида шундай изоҳлар ёзилмоқда:

“Биз “Вальядолид” ҳалок бўлмоқда демаймиз. Йўқ, уни секин-асталик билан ўлдиришмоқда. Ва ҳар куни вазият янада ёмонлашмоқда.”