Ispaniyada bir paytlar katta hurmatga sazovor bo‘lgan sobiq futbolchi Ronaldo boshqarayotgan “Valyadolid” klubida vaziyat tobora yomonlashmoqda. Jamoa La Liganing so‘nggi o‘rnida joylashgan va klub atrofida keskin tanqidlar ko‘paymoqda.

Muammolarning asosiy sababchisi sifatida aynan Ronaldo ko‘rsatilmoqda. U klub prezidenti bo‘lgani holda, ko‘p hollarda jamoa o‘yinlarida qatnashmayapti. Oxirgi vaqtlarda esa vaziyat butunlay shov-shuvga aylandi — o‘tgan dam olish kunlarida “Valyadolid” “Barselona”ga yutqazib turgan paytda, Ronaldo Madridda do‘stlari bilan alkogol ta’sirida tasvirga olindi. Videolavhalarda uni do‘stlari ikki tomondan qo‘ltiqlab, mashinaga o‘tkazayotgani aks etgan.

Muxlislar orasida bunga nisbatan jiddiy e’tirozlar kuzatilmoqda. Klub forumlarida shunday izohlar yozilmoqda:

“Biz “Valyadolid” halok bo‘lmoqda demaymiz. Yo‘q, uni sekin-astalik bilan o‘ldirishmoqda. Va har kuni vaziyat yanada yomonlashmoqda.”