Чемпионлар лигаси финалига қадар етиб борган ва турнирда яхшигина пул ишлаган Миланнинг "Интер" клуби ёзни трансфер бозорида фаол ўтказишни режалаштирмоқда.

"Нерадзуррилар"нинг энг яқин харидлари қаторида "Торино"дан Самуэль Риччи ва "Удинезе"дан Умар Соле бўлиши мумкин. Бу ҳақда Corriere dello Sport нашри хабар бермоқда.

Италия терма жамоасининг 23 ёшли футболчиси Риччи таянч ярим ҳимоячиси сифатида ўйнайди. У жорий мавсум барча мусобақаларда 33 та ўйинда майдонга тушиб, 1 та гол урди ва 2 та голли узатмани амалга оширди. Унинг нархи 30 миллион еврога баҳоланмоқда.

25 ёшли франциялик ҳимоячи Соле марказий зонада ўйнамоқда ва таянч ярим ҳимоячиси позициясини ҳам ёпиб бериши мумкин. У мавсум давомида 16 та ўйинда майдонга тушиб, 1 та гол урган ва 1 та голли узатмани амалга оширган. Унинг нархи 14 миллион еврога баҳоланмоқда.