Мюнхеннинг “Бавария” клуби фахрий президенти Ули Хённес жамоанинг афсонавий мураббийи Юпп Хайнкес ҳақида самимий фикр билдирди. Немис мутахассиси яқин кунларда ўзининг 80 ёшини нишонлайди.
“Ҳаммага маълумки, мен ўзимнинг энг чуқур муносабатларимни айнан Юпп Хайнкес билан қурганман. Буни мен бошқа мураббийларимиз — Пеп Гвардиола, Оттмар Хитцфельд, Карло Анчелотти ёки Луи ван Галларга нисбатан ҳурматимни сақлаган ҳолда айтяпман.
Юпп — ўзига хос инсон ва нодир мураббий. Унинг “Бавария” учун қилган хизмати фақат совринлар билан ўлчанмайди”, — деди Хённеснинг сўзларини T-online нашри келтирмоқда.
Эслатиб ўтамиз, Юпп Хайнкес “Бавария” бош мураббийи сифатида жами 9 та трофейни қўлга киритган.
