“Фулхэм” бош мураббийи Марку Силва Саудия Арабистонининг “Ал-Ҳилол” клуби билан музокаралар олиб бормоқда ва ёздаги Клублар ўртасидаги жаҳон чемпионати олдидан жамоани қабул қилиб олиши мумкин. Бу ҳақда talkSPORT нашри хабар берди.
47 ёшли португалиялик мутахассис 2021 йилдан бери “Фулхэм”ни бошқариб келмоқда ва жамоани Чемпионшипдан Премьер-лигага олиб чиқишга муваффақ бўлган. Унинг амалдаги шартномаси 2026 йилгача амал қилади, аммо у янгиланган шартномани имзолашни кечиктирмоқда.
“Ал-Ҳилол” жорий мавсумда бош мураббий Жорже Жезуш билан хайрлашди ва Клублар ўртасидаги жаҳон чемпионатида иштирок этиш учун янги мураббий изламоқда. Силва уларнинг асосий номзодларидан бири ҳисобланади. Ушбу клубда у собиқ шогирди Александр Митрович билан яна бирга ишлаш имкониятига эга бўлади.
“Фулхэм”нинг эгаси Тони Хан Силвани клубда сақлаб қолишни истайди. Унинг сўзларига кўра, Силва жамоа учун катта аҳамиятга эга ва уни “абадий” сақлаб қолишни хоҳлайди.
