Ёхуд бу худди финалга ўхшайди...

Мен баъзи башоратчиларга ўхшаб, ўйиндан фол очмоқчи эмасман. Сабаби футболга хос машҳур иборада таъкидланганидек, майдон текис, тўп юмалоқ...

Бугун келгуси йили Бразилияда бўлиб ўтадиган жаҳон чемпионатига бериладиган йўлланмалардан яна бир нечтасининг эгаси маълум бўлади. Бу Ўзбекистон ва Қатар терма жамоалари ўйини натижасига ҳам боғлиқ. У худди финал учрашувидай шиддатли ва жозибали бўлиши аниқ. Учрашув қандай ҳисоб билан тугашидан қатъий назар биз ютқазмаймиз.

Сабаби футболчиларимизнинг маҳорати ортаяпти. Осиё минтақасида ўз ўрнимизни топдик. Бизга қарши эҳтиёт бўлиб, ҳадиксираб ўйнаяптилар. Миллий терма жамоамизнинг ғалабалари ёш, умидли футболчиларимизга қанот бўлаяпти, уларнинг ишончи, ҳаваси ва қатъиятини ошираяпти. Энг асосийси, шу футбол туфайли ҳам дунё аҳли ўзбекнинг нималарга қодирлигини англаяпти.

Мен бугун башоратдан кўра умидни устун қўяман. Француз ёзувчиси Александр Дюма айтганидек, "Кутмоқ ва умид қилмоқ керак", яъни ўзбекчасига "Яхши ният – ярим давлат". Мақсадни каттароқ қилаверинг: Биз жаҳон чемпионатида ҳам ютамиз!