Бугунги учрашувдан кейин кайфият йўқлиги аниқ. Шу боис, учрашув ҳақида ҳеч нарса ёзишни маъқул кўрмадим ва мамлакатимизда фаолият олиб бораётган футболга оид сайтларда “пост” қолдираётган мухлислар фикрлари билан қизиқишни маъқул деб топгандим. Шунда, uff.uz сайтидаги бир хабарга кўзим тушиб қолди.

“Ўзбекистон плей-оффда Иордания билан ўйнайди” сарлавҳа остида қўйилган хабарда (манба: http://www.uff.uz/news/sections/asia/79097) “Энди Миржалол Қосимов шогирдлари шу йилнинг 6 ҳамда 10 сентябрь кунлари ушбу давлат термасига қарши майдонга тушишади. Биринчи ўйин Тошкентда бўлиб ўтади.” деган жойга кўзим тушди.

Шундан сўнг, терма жамоамизнинг кейинги тақдири билан қизиқдим ва сайтда қўпол хато юзага келганига амин бўлдим.

Чунки, плей-оффнинг тақдири 2013 йил 19 март куни ЦЮРИХда ташланган қуръадаёқ ҳал қилингандики, Осиё минтақаси плеф-офф баҳсидаги биринчи учрашув "Б" гуруҳида учинчи ўринни эгаллаган жамоа майдонида 6 сентбяр куни ўтказилади. Бугун ўз майдонида Уммон терма жамоасини мағлуб этган Иордания терма жамоаси худди биз сингари гуруҳда учинчи ўринни эгаллада ва плей-оффдаги рақибимизга айланди.

Демак, терма жамоамиз дастлабки учрашувни Иордания пойтахти - Амман шаҳрида ўтказади. Жавоб учрашуви эса 10 сентбр куни Тошкентда бўлиб ўтади. Агар, терма жамоамиз Иордания тўсиғидан эсон-омон ўтиб олса, Жанубий Американинг бешинчи жамоасига қарши майдонга чиқади.

Жорий йилнинг 19 мартида ташланган қуръада КОНМЕБОЛнинг бешинчи жамоаси билан бўладиган плей-офф баҳсининг дастлабкиси 15 ноябр куни Тошкент шаҳрида, жавоб учрашуви эса 19 ноябр куни Жанубий Америкада 5-ўринни эгаллаган терма жамоа майдонида бўлиб ўтади.
Бу ҳам қайсидир маънода, миллий терма жамоамизга маълум устунлик бериши мумкин.

Манба: tolipov.livejournal.com