"Челси" ҳужумчиси Кристофер Нкунку ёзги трансферлар ойнасида жамоасини ўзгартиришга қарор қилди.
27 ёшли футболчи асосий ўйинларда доимий ўйин амалиётига эга эмаслигидан норози. Журналист Санти Аунанинг маълум қилишича, француз "кўклар" сафини тарк этади, томонлар оптимал ечим изламоқда. Ҳужумчини "Ливерпуль" ва "Ньюкасл," шунингдек, "Бавария" ўз сафига қўшиб олмоқчи. Футболчининг ўзи Чемпионлар лигасида иштирок этадиган жамоада ўйнашни хоҳлайди.
Машҳур Transfermarkt портали мутахассислари Кристофер Нкункунинг нархини 45 млн еврога баҳоламоқда. "РБ Лейпциг" собиқ юлдузининг Лондон клуби билан амалдаги шартномаси 2029 йилгача мўлжалланган.
