Ярим ҳимоячи Лука Модрич келажаги борасида бир қарорга келди. AS хабарига кўра, хорватиялик футболчи "Реал"да яна бир мавсум - 2026 йилнинг ёзигача қолишни мўлжалламоқда. Кейин Модрич Хорватия терма жамоаси сафида жаҳон чемпионатида иштирок этишни ва шундан сўнг дарҳол фаолиятини якунлашни режалаштирмоқда.
Қайд этилишича, "Реал"нинг бўлажак устози Хаби Алонсо аллақачон Модричнинг кейинги мавсумда ҳам жамоада қолишини маъқуллаган. Клуб 39 ёшли хорватияликдан маошини камайтиришни сўрайди, аммо Лука учун бу муаммо эмас - у бунга тайёр.
Айтиш керакки, Хорватия терма жамоаси ҳали жаҳон чемпионатига йўлланма олиши керак. "Шашкачилар" бир гуруҳда Чехия, Черногория, Фарер ороллари ва Гибралтар билан куч синашади.
Лука Модрич "Реал" сафида 2012 йилнинг ёзидан буён тўп тепиб келмоқда.
