21 июнь, жума куни "Пахтакор" "Олмалиқ" билан сафарда майдонга тушади. Игорь Шквирин шогирдлари 14 очко билан 7-поғонада боришмоқда. Ушбу мавсумда бу жамоа "Бунёдкор"ни 3:1 ҳисобида доғда қолдирганди. Терма жамоа ўйинлари туфайли юзага келган танаффусда "Олмалиқ" икки назорат ўйинида куч синашди. Ўша баҳслар "Қизилқум" ва "Бунёдкор"га қарши ўтказилди.

Ҳозирга қадар жамоалар олий лигада 10 бор тўқнаш келишган. Уларнинг 8тасида "Пахтакор", биттасида "Олмалиқ" зафар қучган. Яна бир ўйинда кучлар тенг келган. "Шерлар" 17 тўп киритганлар, рақиблар эса 4 бор. Олмалиқдаги 5 учрашувнинг 4тасида жамоамиз ғалабага эришган, фақат бир сафар мезбонлар уч очкони қўлга киритишган. Ўтган мавсумда "Пахтакор" 3:0 ҳисобида муваффақиятга эришган.

Ёшлар таркиблари 20 июнь, пайшанба куни "Металлург" стадионида соат 17:00да ўйинларини бошлашади. Асосий жамоалар эса 21 июнь, жума куни соат 18:00да шу стадионда старт олади.

«Олмалиқ» (Олмалиқ) – «Пахтакор» (Тошкент)
Ҳакамлар: А.Осимов (Тошкент), Р.Фозилов (Наманган), В.Лушин (Гулистон), А.Раҳимов (Андижон).
Назоратчи: И.Нехочин (Наманган).