33 ёшли испаниялик ҳимоячи Лукас Васкес клуб тизимидаги 18 йилдан сўнг "Реал"ни тарк этади. Бу ҳақда унинг ижтимоий тармоқлари орқали таниқли инсайдер Фабрицио Романо хабар берди.
Журналист Васкес бўлажак клублар ўртасидаги жаҳон чемпионатида иштирок этиши, шундан сўнг Мадрид грандини тарк этиши ҳақида хабар берди. Унинг "қаймоқранглилар" билан меҳнат шартномаси шу йилнинг июн ойи охирида якунига етади.
"Қироллик" клуби сафида Лукас 399 та ўйин ўтказиб, 38 та гол урган ва 73 та голли узатмани амалга оширган.
15 июндан 13 июлга қадар АҚШда клублар ўртасидаги жаҳон чемпионати бўлиб ўтади.
