Саудия Арабистонининг «Ал-Ҳилол» клуби «Манчестер Юнайтед» жамоаси сардори ва ярим ҳимоячиси Бруну Фернандешни 15 июндан старт оладиган Клублар ўртасидаги жаҳон чемпионати бошлангунига қадар ўз сафига қўшиб олишни хоҳламоқда. Шу муносабат билан саудияликлар португалиялик футболчига қарор қабул қилиш учун 72 соат вақт берган. Бу ҳақда Give Me Sport хабар бермоқда.

Манба маълумотига кўра, «Ал-Ҳилол» 30 ёшли футболчига ҳафтасига 700 минг фунт маош ва қўшимча бонуслар таклиф қилмоқда. Агар Фернандеш ушбу таклифга рози бўлса, «Ал-Ҳилол» «Манчестер Юнайтед» клуби билан унинг трансфери юзасидан музокаралар олиб боради.

Жорий мавсумда Фернандеш барча мусобақаларда 56 та ўйинда майдонга тушиб, 19 та гол ва 19 та голли пас билан ажралиб турди. Унинг «Манчестер Юнайтед» билан амалдаги шартномаси 2027 йил ёзигача амал қилади. Transfermarkt портали маълумотига кўра, футболчининг бозор баҳоси 55 миллион еврони ташкил қилади.