“Манчестер Юнайтед” ҳужумчиси Алехандро Гарначо Европа Лигаси финали доирасидаги «Тоттенҳем»га қарши ўйиндаги мағлубиятдан сўнг (0:1) ўз агентидан янги жамоа топиб беришни сўраган. Бу ҳақда Defensa Central нашри хабар бермоқда.

Манбага кўра, 20 ёшли футболчи финалда 71-дақиқадан кейин майдонга туширилганидан норози бўлган. Шу сабабли у агентидан Мадриднинг «Реал» клуби билан боғланиб, трансфер имкониятларини ўрганишни истаган.

Бироқ, «қаймоқранглилар» футболчининг юқори нархи сабабли бу трансферга унчалик қизиқмаслиги мумкин. Агар бу вариант амалга ошмаса, Гарначо ўз хизматларини “Атлетико Мадрид”, «Арсенал», «Ливерпуль» ёки «Бавария» клубларига таклиф этишни мўлжалламоқда.

Маълумот учун, жорий мавсум Алехандро Гарначо барча турнирлар доирасидаги 58 ўйинда майдонга тушиб, ўз ҳисобига 11 та гол ва 10 та голли узатма ёздириб қўйган. Унинг “Манчестер Юнайтед” билан шартномаси 2028 йил ёзигача амал қилади. Трансфермаркт порталига кўра, футболчининг қиймати 45 миллион еврони ташкил қилади.