"Наполи" президенти Аурелио де Лаурентис Антонио Конте чемпионлик мавсумидан кейин клубда қолмаслигини маълум қилди.
Жума куни италиялик мураббий жамоа билан скудеттони қўлга киритди, аммо тез орада ўз лавозимини тарк этадиганга ўхшайди. Буни де Лаурентис деярли тасдиқлади.
"Контега келгусида ҳам профессионал муваффақиятлар тилайман. У буларнинг барчасига кундалик машаққатли меҳнати билан эришди. Раҳмат сенга, Антонио!" - дея "Наполи" раҳбарининг мурожаатидан иқтибос келтиради Football Italia.
Антонио Конте бу лавозимни ўтган йилнинг ёзида эгаллаган эди. Кўплаб миш-мишларга кўра, мутахассис Неаполни тарк этгач, ўзи ишлаган "Ювентус" билан шартнома имзолайди.
