27 май оқшомида Вроцлавда Испаниянинг "Бетис" ва Англиянинг "Челси" клублари мухлислари ўртасида жиддий можаро келиб чиқди.
Испаниянинг Estadio Deportivo нашри хабарига кўра, воқеа Конференциялар лигаси финали арафасида содир бўлган. Нашр этилган видеода ҳар икки жамоа мухлислари яқин атрофдаги ресторандан шиша, стакан ва ҳатто стул улоқтиргани акс этган. Бунинг ортидан оммавий муштлашув келиб чиқди. Воқеа жойига тезда етиб келган полиция ходимлари можарони тарқатиб юбориш ва тўқнашувнинг энг фаол иштирокчиларини қўлга олиш учун кўздан ёш чиқарадиган газдан фойдаланишга мажбур бўлди.
Ҳуқуқ-тартибот идоралари вакилларининг сўзларига кўра, тартибсизликлар бир жойда чекланиб қолмаган ва Вроцлавнинг турли ҳудудларида давом этган ва бу финал ўйини олдидан жамоат тартибига жиддий хавф туғдирган.
Бугун, 28 май куни Конференциялар лигаси финалида “Бетис” ва “Челси” тўқнаш келади. Ўйин “Тарчиньски Арена” стадионида бўлиб ўтади ва Тошкент вақти билан соат 23:59да бошланади.
