27 may oqshomida Vroslavda Ispaniyaning "Betis" va Angliyaning "Chelsi" klublari muxlislari o‘rtasida jiddiy mojaro kelib chiqdi.
Ispaniyaning Estadio Deportivo nashri xabariga ko‘ra, voqea Konferensiyalar ligasi finali arafasida sodir bo‘lgan. Nashr etilgan videoda har ikki jamoa muxlislari yaqin atrofdagi restorandan shisha, stakan va hatto stul uloqtirgani aks etgan. Buning ortidan ommaviy mushtlashuv kelib chiqdi. Voqea joyiga tezda yetib kelgan polisiya xodimlari mojaroni tarqatib yuborish va to‘qnashuvning eng faol ishtirokchilarini qo‘lga olish uchun ko‘zdan yosh chiqaradigan gazdan foydalanishga majbur bo‘ldi.
Huquq-tartibot idoralari vakillarining so‘zlariga ko‘ra, tartibsizliklar bir joyda cheklanib qolmagan va Vroslavning turli hududlarida davom etgan va bu final o‘yini oldidan jamoat tartibiga jiddiy xavf tug‘dirgan.
Bugun, 28 may kuni Konferensiyalar ligasi finalida “Betis” va “Chelsi” to‘qnash keladi. O‘yin “Tarchinski Arena” stadionida bo‘lib o‘tadi va Toshkent vaqti bilan soat 23:59da boshlanadi.
