Италия терма жамоаси бош мураббийи Лучано Спалетти якшанба куни Франческо Ачерби жамоага чақирувдан бош тортганини маълум қилди. Шундан сўнг "Интер" футболчиси ижтимоий тармоқда хабар қолдирди.
"Бу қийин қарор, чунки терма жамоа либосини кийиш мен учун доим шараф ва ғурур манбаи бўлиб келган. Бироқ, сўнгги воқеалардан келиб чиқиб, бугунги кунда бу йўлдан хотиржамлик билан боришга шароит йўқлигини ҳис қилдим. Мен баҳона изламайман, лекин ҳурмат талаб қиламан. Агар бу ҳурмат жамоа етакчиларида етишмаётган бўлса, мен четга чиқишни афзал кўраман. Мен мураббий лойиҳасининг бир қисми эмаслигим аниқ", - деб ёзди Ачерби.
Ачерби ўз қарори "Интер"нинг Чемпионлар Лигаси финалида "ПСЖ"га 0:5 ҳисобида мағлуб бўлиши билан боғлиқ эмаслигини таъкидлаб, Италия терма жамоасига ҳам омад тилаган. Июнь ойида Италия терма жамоаси ЖЧ-2026 саралаши доирасида Норвегия ва Молдова термаларига қарши ўйин ўтказади.
