Ўзбекистон футбол ҳакамлиги тизимини янги босқичга олиб чиқиш, ёш ҳакамларнинг назарий билимлари ва амалий тажрибасини ошириш мақсадида Ўзбекистон футбол ассоциацияси томонидан Ҳакамлар академияси ташкил этилганидан хабарингиз бор. Айни кунларда академия ўқув-курсининг 2-модули давом этмоқда.
Амалий машғулотлар учун ёш ҳакамлар Тошкент шаҳри ва Тошкент вилоятларида ўтказилаётган “Спорт мактаблари футбол лигаси” Ўзбекистон чемпионати баҳсларини бошқариб боришди.
Назарий машғулотлар давомида уларнинг ўйинлар давомидаги хатти-ҳаракатлари, позиция эгаллаш маҳорати, қарор қабул қилишдаги аниқликлари ЎФА биринчи вице-президенти Равшан Ирматов, тажрибали инструкторлар ҳамда ФИФА ҳакамлари томонидан муҳокама этилиб, ҳар бир ёш ҳакам билан индивидуал тарзда суҳбатлар ўтказилди, уларнинг камчиликлари таҳлил қилиниб, керакли тушунтириш ва тавсиялар берилди.
