Ўзбекистон ёшлар терма жамоаси 23 июнь, шанба куни Туркияда ўтказилаётган ёшлар ўртасидаги 2013 йилги жаҳон чемпионати баҳсларидаги иштирокини бошлайди.
Шу куни Аҳмаджон Мусаев шогирдлари мусобақа «F» гуруҳи 1-тур учрашувлари доирасида Океания чемпиони – Янги Зеландия ёшларига қарши майдонга тушишади. Тошкент вақти билан 19:00да бошланадиган учрашув Бурсадаги «Bursa Ataturk Stadium»da ўтказилади.
Янги Зеландия ва Ўзбекистон ёшлар терма жамоалари ўртасидаги учрашувни Антонио Ариас бошчилигидаги парагвайлик ҳакамлар бригадаси бошқариб боради. Унга қанотларда ватандошлари – Родни Акиньо ва Карлос Касерес ёрдамчилик қилади. Учрашувнинг тўртинчи ҳаками этиб гамбиялик Бакари Гассама тайинланган.
40 ёшли Антонио Ариас Жанубий Американинг энг иқтидорли ҳакамларидан бири ҳисобланади. 2005 йилдан халқаро учрашувларни бошқариб бораётган парагвайлик ҳакам бунгача 2011 йили Колумбияда ўтган ёшлар ўртасидаги жаҳон чемпионати ўйинларига жалб этилиб, қатор ўйинларни, жумладан, 3-ўрин учун баҳсни ҳам бошқарган эди.
Парагвай Олий дивизиони, Либертадорес Кубоги ва Судамерикана Кубоги учрашувларига мунтазам жалб этиладиган Антонио Ариас ЖЧ-2014 саралаш баҳсларида ҳам ҳакамлик қилмоқда. У ЖЧ-2014 финал босқичи ўйинларига жалб этилиши мумкин бўлган ҳакамларнинг 52талик кенгайтирилган рўйхатига киритилган.
