Ўзбекистон ёшлар терма жамоаси Жаҳон чемпионатининг илк турида эртага Янги Зеландияга қарши баҳс олиб боради. Океания чемпиони ҳисобланган ушбу жамоа июнь ойида 3та ўртоқлик ўйинини ўтказиб, барчасида мағлубиятга учради (Австралия 0:5, Ироқ 3:5 ва Миср 1:2).

Янги Зеландия бош мураббийи Крис Милишич терма жамоа мусобақани бошлашга тайёр эканини айтиб ўтди.

"Мен сизга барча сирларимизни очмоқчи эмасман. Мен барча ишларни эҳтиёткорлик билан амалга оширяпман ва ўзбекистонликларнинг биз ҳақимизда маълумотга эга бўлишининг олдини оляпман. Улар менга биз ҳақимизда деярли маълумотга эга эмаслигини ва бугун ФИФАдан бизнинг ўйинимиз ёзилган видеоёзувни олмоқчи эканликларини айтишди. Ҳайрон қоларли томони, биз ҳам рақиб олдида шундай вазиятдамиз. Айтишим мумкин бўлган ягона нарса — ҳимояда 4 футболчи ўйнайди", дейди Милишич.

Кеча Бурса шаҳрида ҳаво ҳарорати 36 даражагача етди. Милишич эса ўйин бўладиган пайтда ҳаво ҳарорати 24-26 даража бўлишини кутмоқда. Мураббийнинг тан олишича, Австралия ва Ироқ билан ўйиндаги мағлубиятлар жамоанинг ожиз нуқталарини кўрсатиб берган бўлса, Мисрга қарши ўйин жамоага ишонч тақдим этган.

"Мисрга қарши ўйинда биз узоқ вақт давомида яхши ўйин кўрсатдик, аммо 2 марта классик қарши ҳужумдан гол ўтказиб юбордик. Жамоа ҳозир яхши формада ва биз яхши натижаларга умид қилсак бўлади. Айрим хавотирли нарсалар ҳам бор, аммо бу ёмон натижага сабаб бўлиши керак эмас", дейди зеландиялик мураббий.

Милишич гуруҳдаги учала рақиб учун ўзига хос уй вазифасини тайёрлаб қўйган. У Ўзбекистон терма жамоасини жисмоний жиҳатдан бақувват, жамоавий ўйин кўрсатадиган ва қарши ҳужумда яхши ўйнайдиган терма сифатида билади. Зеландияликлар 2011 йили Колумбияда бўлиб ўтган ЖЧда Уругвай билан биргаликда гуруҳнинг қуйи поғонасини эгаллашганди ва ҳар иккала жамоа гуруҳдан чиқа олишмаганди. Хорватиялик футболчилар эса баланд бўйли ва жисмоний бақувват ҳисобланади. Мураббийнинг фикрича, кейинги босқичга чиқиш учун гуруҳда 3 очкони қўлга киритиш етарли бўлади, 4 очко орқали эса гуруҳда дастлабки 2та ўриндан бирини эгаллаш мумкин.