Сербиялик марказий ҳужумчи Душан Влахович Туриннинг "Ювентус" клубидан Туркия чемпионатига йўл олиши мумкин. Бу ҳақда ижтимоий тармоқлар орқали инсайдер Альфредо Педулла хабар бермоқда.
Журналистга маълум бўлишича, ҳужумчига португалиялик мутахассис Жозе Моуриньо мураббийлик қилаётган Истанбулнинг "Фенербахче" клуби қизиқиш билдирмоқда. "Канарейкалар" раҳбарияти аллақачон Влаховичга фойдали таклиф билан чиққан. Томонлар ўртасидаги музокаралар давом этмоқда.
25 ёшли сербияликнинг "кекса синьора" билан амалдаги шартномаси 2026 йилнинг ёзида ўз ниҳоясига етади. Transfermarkt портали Душаннинг бозор нархини 45 миллион еврога баҳоламоқда.













