Туркиянинг "Галатасарой" клуби мавсумлар оралиғида катта трансфер амалга ошириши мумкин. Журналист Али Нажи Кучукнинг маълум қилишича, жамоа "Ливерпуль" дарвозабони Алиссон Бекерни сотиб олиш устида иш олиб бормоқда.

Манбанинг ёзишича, бразилиялик посбон маошга бўлган талабини пасайтирган, бу эса эҳтимолий келишувни осонлаштиради. "Ливерпуль" ёзда Алиссонни қўйиб юбориши мумкин, чунки жамоага ёшроқ Георгий Мамардашвили келади. Эслатиб ўтамиз, грузиялик футболчи ўтган ёзда "Валенсия"дан сотиб олинган, аммо "Ливерпуль" раҳбарияти уни "кўршапалаклар" қароргоҳида ижара асосида қолдирган эди.

"Галатасарой" узоқ йиллик фаолиятидан сўнг жамоани тарк этган Фернандо Муслерага муносиб ўринбосар изламоқда. Алиссон турклар учун устувор номзодлардан бири ҳисобланади.