Португалия терма жамоаси ҳужумчиси Криштиану Роналду Миллатлар Лигаси финалида Испанияга қарши ўйинда олган жароҳати ҳақидаги саволга жавоб берди.

"Ан-Наср" футболчиси ўйиннинг асосий вақти охирида захирага олинишига тўғри келди. Айнан 40 ёшли ҳужумчи 61-дақиқада ҳисобни тенглаштирди (2:2), шундан сўнг жамоалар пенальтилар сериясига қадар гол ура олмади, унда португаллар устун келди (5:3).

"Менинг жароҳатим? Чигалёзди машқларидаёқ оғриқни ҳис қилдим - бу муаммо мени биринчи марта безовта қилаётгани йўқ. Аммо Португалия терма жамоаси учун оёғимни синдиришимга тўғри келса, бунга рози бўлардим. Соврин тақдири ҳал бўлаётганди, мен ўйнашим керак эди ва бор кучимни бердим," - дея Криштианунинг ўйиндан кейинги интервьюсидан иқтибос келтиради The Touchline.