"Манчестер Сити"нинг бир гуруҳ мухлислари абонементлар қоидаларига киритилган ўзгартиришлар юзасидан клуб устидан судга мурожаат қилишди.
Бу ҳақда The Guardian хабар бермоқда. Касаба уюшмаси аъзоларидан ташкил топган "Trade Union Blues" мухлислари гуруҳи Leigh Day адвокатлик фирмаси билан боғланиб, клубнинг абонемент эгаларига қўйган талабларини эътирозга солди. Янги қоидаларга кўра, мухлислар абонементини янгилаш ҳуқуқини сақлаб қолиш учун мавсумда камида 16 та уй учрашувига келиши керак. Ушбу ўйинларнинг фақат олтитаси учун чиптани бошқа шахсга ўтказиш ёки қайта сотиш учун клубга қайтариш мумкин.
Гуруҳ вакилларининг фикрича, ушбу тизим индивидуал ҳолатларни ҳисобга олмайди ва истеъмолчилар ҳуқуқларини бузиши мумкин. Уларнинг фикрича, "Сити"нинг ёндашуви турли сабабларга кўра стадионга мунтазам ташриф буюра олмайдиган мухлисларни камситади. Олдинроқ клуб абонемент эгаларининг ўртача 8 фоизи (жами 37 мингдан) уй учрашувларига келмаслиги ҳақида хабар берган эди.
