Англиянинг "Брайтон" клуби ёш форвард Харалампос Костулас трансфери бўйича келишувга эришди.

"Олимпиакос"нинг 18 ёшли тарбияланувчиси клуб билан 5 йиллик шартнома имзолади ва 1 июлдан бошлаб - барча зарурий расмиятчиликлар, жумладан, халқаро рўйхатдан ўтиш амалга оширилгач, расман "чайкалар" футболчисига айланади.

Костулас Афина гранди таркибида ажойиб мавсум ўтказди: у Греция кубоги чемпиони бўлди, шунингдек, Европа майдонларида қимматли тажриба орттирди. Умуман олганда, ҳужумчи ички ва халқаро майдонда 35 та ўйинда 7 та гол ва 2 та голли узатмани амалга оширди.

ОАВ маълумотларига кўра, трансфер қиймати яна икки миллион евро бонуслар билан 35 миллион еврони ташкил қилади.