ОФК Тартиб-интизом қўмитаси Иордания терма жамоасига нисбатан жазо чорасини қўллаши мумкин. Жазо чораси сифатида Иордания футбол ассоциациясига жарима ва 6 сентябрь куни Ўзбекистон билан ўйинда мухлислар стадионга киритилмаслиги мумкин.

Иордания - Уммон ўйинида комиссарлик қилган ливанлик Мазен Рамазон ўзининг ҳисоботида айрим қоидабузарликларни қайд этган. Уммонга қарши ўйиннинг биринчи бўлимида мухлислар 4 маротаба майдонга лазер нурларини туширишган. Бундай ҳолат иккинчи бўлимда ҳам кузатилган ва натижада Уммон бош мураббийи Пол Ле Гуэн ва иорданиялик футболчи Амир Дийб ўртасида жанжал келиб чиққан.

Бундай ҳолат 26 март куни Японияга қарши ўйинда ҳам юз берганди ва Иордания футбол федерацияси ОФК томонидан огоҳлантирилганди. Демак, бу кетма-кет иккинчи қоида бузилиши ҳисобланади. Энди Иордания терма жамоаси ўзининг навбатдаги расмий ўйинини ёпиқ эшиклар ортида ёки нейтрал майдонда ўтказилиши мумкин. Ассоциацияга нисбатан эса 15 мингдан 25 минг долларгача жарима солинади.

Эслатиб ўтамиз, Иордания - Уммон ўйинини Валентин Коваленко бошчилигидаг ўзбекистонлик ҳакамлар гуруҳи бошқаришган (қанотларда Рафаэль Ильясов ва Маъмур Саидқосимов). Учрашувда мезбонлар 1:0 ҳисобида ғалаба қозониб, "В" саралаг гуруҳида 3-ўринни қўлга киритишди. ЖЧ-2014 Осиё қитъасининг плей-офф баҳси Иордания ва Ўзбекистон терма жамоалари ўртасида 6 ва 10 сентябрь кунлари ўтказилади. Дастлабки ўйин Амманда бўлиб ўтади.