BILD хабарига кўра, "Байер" ёзда сотувга номзод сифатида ҳужумчи Виктор Бонифасени кўриб чиқмоқда. Қишда нигериялик Саудия Арабистони клубига ўтишга яқин турганди, бироқ сўнгги дақиқаларда келишув барбод бўлди. Энди леверкузенликлар форвард учун тахминан 50 миллион евро олишга умид қилмоқда.
Муаммо шундаки, Бонифасенинг ўзи энди клубни тарк этишни истамайди. Бу "Байер"нинг янги бош мураббийи Эрик тен Хаг учун биринчи "бош оғриғидир".
Клубнинг асл режаси бошқача эди. Патрик Шикни қолдириш, Бонифасени сотиш ва унинг ўрнига янги форвард билан шартнома имзолаш. Бонифасенинг агенти Эмефи Анеке берган изоҳида вазиятни тушунтириб берди.
"Виктор терма жамоага сафаридан сўнг мавсумни якунлади. Ҳозир у таътилда, фаол машғулот ўтказмоқда, кейин эса мавсумолди машғулотларига қайтади. Клубда янги мураббий, янги қарашлар бор, аммо жамоа ҳали ҳам кучли ва Чемпионлар лигасида ўйнайди. Виктор билан мен ҳеч қачон эҳтимолий трансфер масаласини муҳокама қилмаганмиз", - деди агент.
2024/25 йилги мавсумда Бонифасе “Байер” сафида барча турнирларда 27 та ўйин ўтказиб, 11 та гол ва 2 та голли узатмани амалга оширган.
