Лионель Месси яна бир бор ўйиннинг энг яхши футболчиси деб топилди. Клублар ўртасидаги жаҳон чемпионатида "Порту"га қарши кечган баҳснинг 54-дақиқасида 37 ёшли футболчининг жарима зарбасидан урган голи "Интер Майами"га ғалаба келтирди - 2:1. Финал ҳуштагидан сўнг аргентиналик футболчи учрашувнинг бош қаҳрамони унвонига сазовор бўлди - 2003 йилда профессионал футболдаги дебютидан бери унинг 395 та шундай мукофоти бор.
Лионель Месси фаолиятининг катта қисмини "Барселона"да ўтказган ва 2021 йилда клубни тарк этган. Кейинги икки йил давомида ҳужумчи "ПСЖ"да ўйнади, кейин эса "Интер Майами"га кўчиб ўтди ва ҳозиргача унинг шарафини ҳимоя қилмоқда.
"Қизилиштонлар" 24 июнь куни КЎЖЧ гуруҳ босқичи 3-турида "Палмейрас"га қарши баҳс олиб боради.
