Ўзбекистон футбол ассоциацияси раҳбарияти ФИФА техник департаменти бош мутахассиси Мишел Саблон билан учрашди.

Учрашув давомида мураббийлар таълими сифатини ошириш, инструкторлар тайёрлаш, мураббийлик курсларини замонавий методика асосида ташкил этиш масалалари муҳокама қилинди.

Шунингдек, замонавий футболда мураббийлар таълимининг тутган ўрни, ушбу йўналишдаги жаҳон тенденциялари ва инновацион ёндашувлар ҳақида фикр алмашилди. Учрашувда мураббийлик тизимини янада такомиллаштириш орқали оммавий ва профессионал футболни босқичма-босқич ривожлантиришга қаратилган дастурларни мамлакатимизда самарали амалга ошириш муҳимлиги таъкидланди.

Терма жамоалар қайд этаётган натижалар замирида мураббийлар таълими алоҳида ўрин эгаллаши қайд этилди. Шу билан бирга, Юқори Чирчиқ туманида м барпо этиладиган замонавий футбол марказида футбол соҳасидаги мутахассисларни тайёрлаш маркази фаолият юритиши, у ерда кўплаб мураббий ва инструкторлар тайёрлаш режалаштирилгани ҳақида маълум қилинди.

Томонлар мазкур йўналишда олдинда турган лойиҳаларни муҳокама қилиб, ўзаро узоқ муддатли самарали ҳамкорликка тайёр эканликларини билдирдилар.