Мамлакатимизда иқтидорли ёш спортчиларни саралаш, танлаш ва оммавий спортни ривожлантиришга йўналтирилган “Беш ташаббус олимпиадаси” доирасида ўтказилаётган тизимли мусобақалар ёшларнинг бўш вақтини мазмунли ташкил этишга хизмат қилмоқда.

Волейбол бўйича “Ички ишлар вазири кубоги”нинг аёллар ва ўғил болалар ўртасида Тошкент ва Фарғонада ўтказилган республика босқичи мусобақалари ҳақиқий спорт байрами кўринишини олди.

Пойтахтимизда "Беш ташаббус олимпиадаси" доирасида волейбол бўйича "Ички ишлар вазири кубоги" нинг ўғил болалар ўртасидаги 16-21 ва  22-30 ёш тоифасидаги ўйинлар сарҳисобига кўра, ҳар икки ёш тоифасида Тошкент жамоалари ғолиблик шоҳсупасига кўтарилди. 16-21 ёшлилар орасида совринли ўринлар Фарғона ва Сурхондарё вилояти вакилларига насиб этган бўлса, 22-30 ёшлилар ўртасида Сурхондарё ҳамда Қашқадарё вилояти жамоалари 2 ва 3-ўринларни эгаллади.

Аёллар ўртасидаги мусобақаларда эса 16-21 ёшли қизлар жамоалари ўртасидаги ўйинларда фарғоналик волейболчи қизлар энг юқори ўринни банд этди. Кейинги поғоналардан Бухоро ва Самарқанд вилояти вакиллари жой олди. 22-30 ёш тоифасида эса Навоий, Андижон,Фарғона вилоятлари жамоалари совринли ўринлар соҳиби бўлишди.

– Ҳар икки ҳудудларда ташкил этилган “Беш ташаббус олимпиадаси” доирасидаги “Ички ишлар вазири кубоги” ўйинлари натижасида бир қатор иқтидорли ёшлар кашф этилди. Улар келгусида терма жамоаларга жалб этилиши кўзда тутилмоқда. Бундан ташқари, бундай оммавий мусобақалар орқали мураббий ва мутахассисларнинг иш тажрибаси, маҳорати ортди, – дейди Ўзбекистон волейбол федерацияси бош котиби Фарҳод Алимов.

Мусобақалар сўнгида ғолиб ва совриндорларни тақдирлаш маросимларида Спорт вазири Адҳам Икромов, Ўзбекистон волейбол федерацияси раиси ўринбосари Жамшид Файзиев, Фарғона ва Тошкент шаҳар Ички ишлар бошқармалари мутасаддилари иштирок этди.