Бундан 129 йил муқаддам франциялик Пьер де Кубертен бошчилигида Олимпия ўйинларини замонавий кўринишда қайта тиклаш ишлари бошланган эди.

Олиб борилган саъй-ҳаракатлар натижасида 1894 йилнинг 23 июнь куни Халқаро олимпия қўмитаси (ХОҚ)га асос солинди. Шундан бери, ушбу сана "Олимпия куни" сифатида дунё бўйлаб кенг нишонлаб келинади.

Бугунги кунга келиб, "Олимпия куни" халқаро спорт оламида энг оммавий тарзда нишонланадиган спорт байрамларидан бирига айланган. Ҳар йили Халқаро олимпия қўмитасига аъзо 205 та миллий олимпия қўмиталарида ўтказиладиган спорт ва саломатлик байрамида миллионлаб инсонлар бевосита иштирок этмоқда.

Ушбу тадбирни ўтказишдан кўзланган асосий мақсад аҳоли орасида соғлом турмуш тарзини ҳамда Олимпизм ғояларини кенг тарғиб этиш, инсонлар қалбида жисмоний тарбия ва спортга бўлган меҳрни янада юксалтиришдан иборат.

Бугун, 23 июнь – “Олимпия куни” кенг нишонланаётган дамда Халқаро олимпия қўмитасининг янги сайланган илк аёл президенти Кирсти Ковентри ўз иш фаолиятини расман бошлайди.

2013 йилдан ХОҚ раҳбари сифатида фаолият олиб борган германиялик Томас Бах бугун расман фаолиятини якунлайди. Унинг ўрнига ушбу лавозимда тарихда илк бор аёл киши – зимбабвелик Кирсти Ковентри вазифага киришади.