Мадриднинг "Реал" клуби клублар ўртасидаги жаҳон чемпионати гуруҳ босқичининг сўнгги туридан ўрин олган "Ред Булл Зальцбург"га қарши баҳсга тайёргарлик кўрмоқда.

Учрашув жума куни бўлиб ўтади, унинг бошланиши Тошкент вақти билан соат 06:00 га белгиланган. Marca хабарига кўра, яқинда жароҳатини даволаган Антонио Рюдигер ҳали бошланғич таркибда майдонга тушишга тайёр эмас, шунинг учун "қаймоқранглилар" ҳимояси марказида Дин Хёйсенга Орельен Тчуамени ёрдам беради. Эслатиб ўтамиз, Рауль Асенсио дисквалификация қилинди - "Пачука"га қарши ўтган баҳсда у тўғридан-тўғри қизил карточка олганди.

Аввалроқ Хаби Алонсо номинал ярим ҳимоячи Тчуаменини ҳимоя марказида ўйнатишни истамагани ҳақида хабарлар тарқалганди, бироқ ҳозирги вазиятда бош мураббий учун бошқа йўл йўқ.