Клублар ўртасидаги жаҳон чемпионати 1/8 финалидан ўрин олган "Челси" - "Бенфика" учрашуви олдидан лондонликлар ҳимоячиси Леви Колвилл Португалия жамоаси ҳужум чизиғи етакчиси, Аргентина терма жамоаси сафида жаҳон чемпиони бўлган Анхель Ди Мария билан учрашувдан нималар кутаётгани ҳақида гапирди.
37 ёшли аргентиналик футболчи мусобақанинг гуруҳ босқичида учта гол урди ва "Бенфика" таркибида асосий фигура бўлиб қолмоқда. ФИФА матбуот хизматига берган изоҳида Колвилл рақибнинг даражасини таъкидлади:
"Ди Мария - ажойиб тоифадаги ўйинчи. Мен уни ёшлигимдан кузатганман ва ҳар доим унинг техникасига қойил қолганман. У деярли ҳар бир имкониятдан фойдаланишга қодир. Умид қиламанки, биз уни имкон қадар тезроқ зарарсизлантиришга, чап оёғини тўсишга ва ҳужум қилиш учун жой қолдирмасликка муваффақ бўламиз," - деди ҳимоячи.
"Челси" ва "Бенфика" ўртасидаги баҳс бугун, 28 июнь куни Шарлоттда бўлиб ўтади ва Тошкент вақти билан 01:00 да старт олади.
