Klublar o‘rtasidagi jahon chempionati 1/8 finalidan o‘rin olgan "Chelsi" - "Benfika" uchrashuvi oldidan londonliklar himoyachisi Levi Kolvill Portugaliya jamoasi hujum chizig‘i yetakchisi, Argentina terma jamoasi safida jahon chempioni bo‘lgan Anxel Di Mariya bilan uchrashuvdan nimalar kutayotgani haqida gapirdi.

37 yoshli argentinalik futbolchi musobaqaning guruh bosqichida uchta gol urdi va "Benfika" tarkibida asosiy figura bo‘lib qolmoqda. FIFA matbuot xizmatiga bergan izohida Kolvill raqibning darajasini ta’kidladi:

"Di Mariya - ajoyib toifadagi o‘yinchi. Men uni yoshligimdan kuzatganman va har doim uning texnikasiga qoyil qolganman. U deyarli har bir imkoniyatdan foydalanishga qodir. Umid qilamanki, biz uni imkon qadar tezroq zararsizlantirishga, chap oyog‘ini to‘sishga va hujum qilish uchun joy qoldirmaslikka muvaffaq bo‘lamiz," - dedi himoyachi.

"Chelsi" va "Benfika" o‘rtasidagi bahs bugun, 28 iyun kuni Sharlottda bo‘lib o‘tadi va Toshkent vaqti bilan 01:00 da start oladi.