Чемпионшип вакили "Шеффилд Юнайтед" "Тоттенхэм" футболчиси Эшли Филлипс хизматига қизиқиш билдирмоқда. Бу ҳақда Британиянинг The Star нашри хабар бермоқда.
Манбага кўра, ҳимоя чизиғини кучайтиришга жуда муҳтож бўлган "Шеффилд" футболчи учун 7 миллион евро тўлашга тайёр, чунки у "улкан салоҳият"га эга. 20 ёшли Филлипс ўтган мавсумни "Сток Сити"да ижарада ўтказди (35 ўйин, 6 сариқ карточка), аввалроқ эса "Плимут"да ўйнаган.
Қайд этилишича, "шпорлар"нинг янги устози Томас Франк футболчининг келажаги бўйича якуний қарор қабул қилишдан олдин унга ўзини кўрсатиш имконини бериши мумкин.
