Лондоннинг "Челси" клуби ҳужум чизиғини кучайтириш билан фаол шуғулланмоқда. Тез орада жамоа сафини "Боруссия" Дортмунддан Жейми Байно-Гиттенс ва "Брайтон"дан Жоао Педро тўлдириши кутилмоқда - иккаласи ҳам келишувга эришган. Трансферларнинг умумий қиймати 100 млн евродан ошиши кутилмоқда, аммо "кўклар" раҳбарияти бу билан ҳам тўхтаб қолмаслиги мумкин. Журналист Фабрицио Романонинг маълум қилишича, "Челси" Байно-Гиттенс ва Педро келганидан кейин яна бир ҳужумчи сотиб олиш имкониятини кўриб чиқмоқда.
Худди шундай маълумотлар билан инсайдер Бен Жейкобс ҳам ўртоқлашди: "Челси"нинг эҳтимолий нишони "Айнтрахт" вакили Уго Экитикедир, бироқ кўп нарса клубни Николас Жексон тарк этишига боғлиқ бўлади.
