"Интер Майами" клублар ўртасидаги жаҳон чемпионатининг 1/8 финалида "ПСЖ"га 0:4 ҳисобида ютқазди. Ўйиндан сўнг Лионель Месси гуруҳ босқичининг сўнгги турида жамоа "Палмейрас" устидан қозонилган ғалабани қўлдан чиқаргани, натижада иккинчи ўринни эгаллаб, жиддийроқ рақиб билан тўқнаш келганини эслади.

"Биз икки тўп фарқи билан олдинда эдик, якунда дуранг ўйнадик, натижада "ПСЖ"га тушиб қолдик, бу анча қийинроқ. Бу баҳона эмас - шунчаки вазият бошқача бўлиши мумкин эди. Биз 2:0 ҳисобида олдинда эдик, рақиб эса сўнгги 10 дақиқада ҳисобни тенглаштирди. Бу ҳолат бизда аччиқ таассурот қолдирди," - деди Месси DSports билан суҳбатда.

Агар "Интер Майами" "Палмейрас" устидан ғалабани сақлаб қолганида, 1/8да "Ботафого"га қарши ўйнаган бўларди.