Мадриднинг "Реал" клуби бош мураббийи Хаби Алонсо ҳужумкор ярим ҳимоячи Арда Гюлернинг ўйини ҳақида фикр билдирди.
"Қаймоқранглилар"нинг "Ювентус"га қарши кечган (1:0) КЎЖЧ 1/8 финали доирасидаги сўнгги баҳсида туркиялик футболчи асосий таркибда майдонга тушиб, ўзини ёрқин кўрсатди. Эътиборлиси, Гюлер учрашув иштирокчилари орасида энг кўп узатма ва тўпга тегинишларни амалга оширди.
Журналистлар Алонсодан 20 ёшли футболчи унинг тактик тизимида плеймейкер бўладими, деб сўрашди.
"Замонавий футболда бир футболчига ўйинни назорат қилишни топшириб бўлмайди. Биз буни барча ярим ҳимоячилар - Вальверде, Себальос, Тчуаменидан талаб қиламиз. Бизга мувозанат керак. Арда жуда яхши, мен ундан мамнунман, лекин барчадан яхши ўйин кутаман," - деди Алонсо матбуот анжуманида.
